Бөлүмдөр
Дүйшөмбү, 21-октябрь
Нарын облусуАт-Башы району 30.09.2019 17:42 На русском

Жолдон карышкырлар чыкканда, аларды карап күлүп коебуз, - Тез жардам унаасынын айдоочусу

Turmush -  Кубатбек Казиев 20 жылдан бери Ат-Башы райондук үй-бүлөлүк медицина борборунун Ак-Сай өрөөнүндөгү тез жардам бөлүмүндө айдоочу болуп эмгектенип келет. Аны менен аймактык кабарчы таанышты.

Кубатбек Казиев 1962-жылы Ак-Сай өрөөнүндөгү Ак-Бейит аймагында туулган. Жаш кезинде маданият чөйрөсүндө эмгектенип, ушул тармакта билим алган.

«Ата-энем жол кызматкери болуп иштешкен. Башында Ат-Башыдагы жатак мектепте, кийин Касыке Мамбеталиев атындагы орто мектебинде окудум. Аскерге бардым. Токмоктогу маданият техникумунда билим алып, маданий иш-чараларды уюштуруу боюнча адистикти алдым. Бирок өз кесибим менен иштеген жокмун. Союз тарап кетти. Болгону Ат-Башы райондук маданият бөлүмүндө айдоочу, 8 жыл “Арашан” ансамблинде бас-гитарист болуп иштегем. 20 жылдан бери Ат-Башы райондук үй-бүлөлүк медицина борборунун Ак-Сай өрөөнүндөгү тез жардам бөлүмүнүн унаасынын айдоочусу болуп эмгектенип келем. Эмгегим бааланып, Ат-Башы райондук мамлекеттик администрациясы тарабынан “Калктын кадырман инсаны” наамы берилди. 2-3 жылдан бери акимчилик ишибизди баалап жатышат.

Өзүмдүн жумушумду сүйөм. Кыйынчылыктар болот, ага деле көнгөм. Эл үчүн кызмат кылып жатам. Кандай унаа келсе деле өздөштүрүп кетем. Мурда Ак-Сай ФАПта 3 айдоочу бар болчу. Кийин кыскарып отуруп мен эле калдым. Күйүүчү майга жараша кыдырып калганбыз. Жаз-күз айларында эмдөө учурунда гана кыдырабыз», - деди ал.

Каармандын айтымында, Ат-Башы бийик тоолуу район болгондугуна карабастан медиктердин жана айдоочулардын айлыгы аз.

«Тапкан акчам үй-бүлөмдү багууга жетет. Ат-Башы району бийик тоолуу район деп жакшы карайт. Бирок башка жакка салыштырмалуу айлык аз, эч кандай жеңилдиктер жок. Айлыгыбызды аскер адамдардыкындай жогору кылып койсо болмок. Ак-Сайда медицина кызматкерлеринен 5 адам иштейт.

Жумушубуз кызыктуу, ар кандай бейтаптар болот. Келиндер бизге кеч кайрылып, жолдон көз жаргандар болот. Кээде унаабыз ташка, карга тыгылып калат. Жолдо баратканда алдыбыздан көп эле карышкыр чыккан. Андай убакытта “карышкыр, карышкыр” деп эле күлүп коебуз. Жаныбызда мылтыгыбыз болбосо эч нерсе кыла албайбыз да. Унаанын ичине эле жашынып калабыз (күлүп).

1991-жылы үй-бүлөм менен Кында ашуусунан чыга албай калганбыз. Кар калың болуп, унаа жүрбөй калган. Балдарымды төшөккө ороп алып, жубайым экөөбүз жөө жөнөдүк. Ошондо бир кызыбыз 1 жашта болчу. Чек арачылар келип, жардам беришкен. Эки саат дегенде ашуудан чыкканбыз. Унаабыз ошол жерде калган.

1986-жылы үйлөнгөм. Жубайым Маданий техникумдан китепканачы адистигин окуган. 2 уул, 2 кызым жана 3 неберем бар», - деди айдоочу.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×