Бөлүмдөр
Дүйшөмбү, 21-октябрь
Нарын облусуАт-Башы району 02.10.2019 11:41

Айыл турмушу: Ат-башылык К.Кулуев аймактагы жаштардын көйгөйүн атап берди

Turmush -  26 жаштагы Казыбек Кулуев коомдук иштерге катышып, жаш кадрларды аймакка тартуунун жолун издеп келет. Аны менен аймактык кабарчы таанышты.

Казыбек Кулуев 1993-жылы Ат-Башы айылында туулган. Мектепти аяктаган соң Соода жана башкаруу, укук, финансы жана бизнес эл аралык академиясынын коммерциялык-экономикалык техникумунун менеджмент адистигин бүткөн. Бойдок, 3 бир туугандын ортончусу. Ата-энеси жеке ишкерлик менен алектенишет.

«Окуу жайды аяктаган соң билимимди жогорулатуу максатында аталган техникумга барып, аны 2017-жылы ийгиликтүү аяктадым. 2015-жылдан баштап «Ат-Башы жаңылыктары» редакциясында кызмат кылып келем. Окуу менен ишти бир алып кеттим. Башында дизайнер-кабарчы болуп киргем, азыр корректор болуп эмгектенем. 2017-жылы редакторубуз эмгегибизди баалап, мени «Жылдын мыкты басма сөз кызматкери» деген наамга көрсөтүп, Ат-Башы райондук мамлекеттик администрациясына сунуш берген. Ошол эле жылы өзүбүздүн гезиттин ардак грамотасын тапшырган», - деди ал.

Казыбек Кулуев коомдук иштерге дагы активдүү катышат.

«Ат-Башы райондук жаштар уюмунун негиздөөчүлөрүнүн бирибиз. Учурда мүчөсү болуп эмгектенебиз. Коомдук бирикмеде ар тараптан келген жаштар бар. Маданият, спорт, билим берүү, медицина тармагынан чогулган. Алар менен бирге райондун кайсы бир көйгөйүн чечели деп уюшулганбыз. Келечекте жардамыбыз тийип, райондун өнүгүшүнө кичине болсо дагы салым кошолу деп аракет кылып жатабыз. Балдарга ар кандай иш-чара, семинар, тренингдерди уюштуруп турабыз. Жеке эле жаштар менен чектелип калбай, улуу муунду дагы кошобуз. Алар менен дагы иштешебиз. Спорттук иш-чараларды, ар кандай оюн-зоокторду уюштуруп турабыз. Быйыл райондо алгачкы жолу окуучуларга 3 күндүк бекер жайкы лагерь уюштурдук.

Билимдүү жаштардын көп болгону жакшы. Мурунку жылдарга салыштырмалуу жаштардын көбү билим алганы Нарын, Бишкек шаарларына кетишүүдө. Жакшы окугандар чет өлкөгө чейин чыгып кетип жатышат. Бирок эң өкүнүчтүүсү — тажрыйбалуу адистер кайра биздин айылга кайтпай жаткандагысы. Айрымдарынан эмне үчүн келбей жатканын сурайбыз. Маянанын аздыгын, эмгектин бааланбагандыгын жана улуу муун жаш кадрларга орун бербей жатканын айтышат. Мунун дагы алдын алууга, жаштарды өзүбүзгө тартканга аракет кылып жатабыз. Аларга колдон келишинче түшүндүрүп жатабыз. Жаштардын арасындагы негизги көйгөй ушул болуп жатат», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×