Бөлүмдөр
Дүйшөмбү, 21-октябрь
Нарын облусуАт-Башы району 02.10.2019 12:58

Айыл турмушу: Дарыгер Г.Мустапаева тоодо төрөгөн чабандын аялын унутпайт

Turmush -  Гүлмира Мустапаева медицина тармагында 36 жылдан бери эмгектенет. Аны менен аймактык кабарчы таанышты.

Гүлмира Мустапаева 1967-жылы Ат-Башы районуна караштуу Ат-Башы айылында туулган. Нарын медициналык училищасында билим алып, аны 1985-жылы бүткөн. Ошол жылы Ат-Башы райондук ооруканасынын хирургия бөлүмүнө ишке кирип, эмгек жолун баштаган. 1990-жылы Ак-Моюн айылына келин болуп келген. 1996-жылдан бери ушул айылдагы фельдшердик-акушердик пунктта фельдшер болуп иштейт. Анын 2 кыз, 1 уулу жана 4 небереси бар.

«Айрым бейтаптар ичкилик ичип алып келишет. Кайра уялып кетип калышат. Айылдагы бир кош бойлуу келин үйүндө эс-учун жоготуп жатып калыптыр. Кан басымы бир аз көтөрүлүп кетиптир. Аны Нарын шаарына алып баратсак, жолдон унаа бузулуп калды. Кыш болчу. Ошондо тиги келин бизди күнөөлөп, “эртерээк жаткырып койбойсузбу” деп урушту. Ушундай да бейтаптар болот.

Быйыл эхинококк күчүнө кирип жатат, 2 адамдан чыкты. Бирөө операция болду, экинчиси октябрь айында операция болот. Гепатит, сарык оорулары деле жок. Айылда 3 жылдан бери таза суу жакшы чыгат. Санэпидемстанциядан келип, суунун башына хлорамин салышат», - деди ал.

Гүлмира Мустапаева жумушундагы кезиккен окуяны айтып берди.

«2000-жылы бир бейтаптын күйөөсү тоодон ат чаап келди. “Болуңуз, болуңуз” деп бизди шаштырды. Көрсө аялы баласын 7 айлык кылып айына жетпей төрөп салыптыр. Барсак, бала жер төшөктүн үстүндө экен. Жанымдагы акушер баланы алып, башка жерге жаткырды. Анан жер төшөктү алайын дегенде андагы кан бетине чачырап кетти. Ошондогу окуя эсимден кетпейт.

Мурда үйдөн, боз үйдөн төрөгөн келиндер, киндик кескен апалар көп болчу. Азыр үйдөн төрөтпөйбүз. Анткени азыркы жаштардын организми алсыз», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×