Turmush — Талас районунун тургуну Алымбек Назеков 18 жылдан бери жактоочу болуп иштеп келет. Аймактык кабарчы аны менен таанышты.
Өзүнүн айтымында, 1975-жылы орто мектепти аяктагандан кийин Советтик Армиянын катарына чакырылып 2 жылдык аскердик милдетин өтөп келген. Эмгек жолун Талас районундагы «Жерге-Тал» асыл тукум чарбасында жумушчу болуп иштөөдөн баштаган. 1980-1985-жылдары Бишкек шаарындагы 1-Май районунда ички иштер бөлүмүндө кызматта 5 жыл иштеген. 1985-1990-жылдары Кыргыз мамлекеттик университетинин тарых факультетин бүтүргөн.
«Биз мезгилдерде Чүй облусунун Ысык-Ата районунун элге билим берүү бөлүмүндө мугалим болуп иштөөдөн баштап, бөлүмдүн орун басарлыгына чейин көтөрүлдүм. Бул кызматтарда иштеп жүргөн жылдары райондун мектептерин керектүү жабдыктар менен камсыздоо, оңдоп-түздөө иштерин жүргүзүү милдеттерин так жана жоопкерчилик менен аткарып, көпчүлүктүн алкышына арзып келдим.
Жактоочулук кызматта 2008-жылдан баштап эмгектенип келе жатам. Талас облусунун адвокаттар коллегиясында 2021-2024-жылга чейин башчылык кызматында иштедим», - деди ал.
- Кыргыз адвокатурасы уюшулгандан бери кандай татаал жолду басып өттү?
- Кыргыз адвокатурасы 101 жылдын аралыгында бир канча татаал жолду басып өттү. 100 жыл деп жеңил айтылганы менен бул бир кылымды камтып жатпайбы. КРнын адвокатурасынын башкармалыгы Бишкек шаарында 1925-жылы 1-мартта уюшулуп, кийинчерээк райондордо өкүлчүлүктөр уюшулган. Алгачкы мезгилдерде адвокаттар жетишсиз болгон учурлар болуптур. Акырындык менен адвокаттык кызмат талапка жооп бере баштаганда коомдук бирикмеге жетишилген. Ошол мезгилде эле адвокаттардын иштөө шарттарын мамлекет колдоого алып, мүмкүнчүлүккө жараша имараттар менен камсыз кылышкан. Республикабыз өз эгемендүүлүгүн алгандан баштап, замандын талабына карата реформалар жүрүп, бүгүнкү күндө өз милдеттерин татыктуу аткарып келишет.
- Талас адвокатурасы тууралуу айтып кетсеңиз?
- Учурда 20 адвокат кызмат көрсөтүп келе жатабыз. Биздин уюм мамлекеттик болбогондуктан келишимдин негизинде аткарган кызматыбызга жараша кардарлардын эсебинен айлык акы алабыз. Жарандык, административдик кылмыш иштери боюнча мыйзамдардын талабына карата кызматыбызды аткарып жатабыз.
Адвокат биринчиден коомубуздун коопсуздугу, жарандардын Конституциялык жана башка мыйзамдар менен корголгон укуктарын татыктуу коргоо болуп эсептелет. Баш мыйзам менен коргоого алынган ар бир жарандын жеке купуялуулугун сактоо биздин милдет болуп эсептелет. Ар кандай турмуштук жагдайлар менен аргасыздыктан жарандарыбыз, юридикалык тараптар бизге жардам алуу үчүн кайрылышат.
- Адвокаттык ишиңизде сизди аябай түйшөлткөн нерсе барбы?
- Кийинки учурларда үй-бүлө институтуна байланыштуу маселелер менен кайрылуулар көбөйүп баратат. Никени бузуу, алимент, мүлк бөлүштүрүү иштери басымдуу болуп жатат. Никени бузуу процессинде ортодо жашы толо элек балдары бар жагдайда оор учурлар болот. Жактоочу катарында биринчиден тараптарды элдештирүү, үй-бүлөнү сактап калуу аракетин көрүп келебиз. Бирок биз ойлогон жыйынтыктар көп учурда ишке ашпай, үй-бүлө очогунун бузулуусу көбүрөөк болуп жатат. Жаш балдардын келечегине карата капа болобуз. Алардын келечеги кандай болот деген суроо кыйнап келет. Айрым учурларда үй-бүлөнү бузулуудан сактап калган окуялар орун алат. Адвокаттык ишимде андай оң, жакшы иштер мени кубандырып, андан ары да иштөөгө шык берет.
Үй-бүлөнү, никени бузуу жана ортодо мүлктөрүн бөлүштүрүү ишке 2024-жылы Кара-Буура райондук сотунда доогердин кызыкчылыгын коргоп калдым. Жуюайлар никеде жашап турганда 2 эркек уулдуу болушуптур. Менин милдетим доогердин талабына карата никени бузуу жана мүлкүн бөлүштүрүү болчу. Кичинекей 2 баланын кызыкчылыгына карата мен алган милдеттенмени өзгөртүп, үй-бүлөнү элдештирип, алардын 2 уулун чогуу тарбиялап чоңойтуу мүмкүнчүлүгү үчүн бардык аракетимди көрдүм. Акырында аракетимдин натыйжасы чыгып, тараптар элдешүүгө барып, үй-бүлө сакталып калды. Бул окуяны мен жакшы окуя катарында деп эсептейм.
Негизи соттор жана биз адвокаттар үй-бүлөнү сактап калуу аракетинде дайыма биргебиз. Үй-бүлө мамлекеттин кичине бөлүкчөсү катарында жакшы түшүнөбүз. Кыргыз мамлекетинде аз камсыз болгон жарандарга адвокаттык жардам көргөзүү туурасында 2017-жыл чыккан мыйзамыбыз бар. Ал мыйзам боюнча 8 адвокат иш алып барабыз. Ал мыйзамдын негизинде жарандарга акысыз кеп-кеңештерди көргөзүп, соттук териштирүүдө мамлекеттин эсебинен юридикалык жардамыбызды көргөзүп келебиз. Көрсөткөн жардамдарыбызга нааразы болгон жарандар учурай элек.